Kako uspiti u životu?
Ako ste mislili da ja znan govoriti samo o piturivanju i jadrenju, gadno ste se prevarili..
Nema toga ča ja ne znan!!!
Foto: Pexels
Znan ja judi da je medju vami puno onih ča su završili visoke skule. Niste vi svi judi od zanata, kirofe, mišalice, piture, fratuna, glazure i nivelacije nekretnin ča se ne kreću.
I kako ono je bilo, osan godin do male mature, unda gimanzija oli neka skula o informatike, četri godine, fakultet još bar četriipo-pet, specijalizacija, doktorizacija i kako se reču te lipe stvari, ode po života u papar..
Je, neki su malo više utvrdili gradivo pa in je fakultet potraja i deset godin, ma to su judi na svon mistu i sada su veliki strukovnjaci u svojin strukama.
Nebi se hoti mišati, ma čini mi se da su neki od ovdi prisutnih malo preskočili školovanje ča je redovno, pa su na izbarednom studiju u Bosni završili dvi-tri godinice u jedno popodne. Je, malo je skupje bilo, ma, ča je to kada se to stavi u škvaru sa onin drugin; najti stan, platiti hranarinu, tiket za trajvan, spizu, piti, grijanje na plin, komunalije, članarinu za u knjižnicu, robu, ki dinar za u žep i za počastiti curu..
Unti irudaaaa ča bi se nakupilo da je ki vodi knjigovodstvo kako triba..
Kad se sve to skupi na jedan kup, školovanje u Bosni je puno cinije a i efikasnije.
Bilo kako bili, vi ste završili vele skule i postali ste strukovnjaki od struke, i to, kako se reče, cvit našega lipoga društva i pridružene prirode.
Uvatili ste lipi posa preko veze, malo rodbina, malo stric iz Merike, malo pršutić, a za pravo, najviše drug iz Partije.
Prije je to bilo katastrofa, bila je samo jedna Partija i kad bi nazva neki drug od položaja za činiti neki pritisak, tote ni bilo nikakve dvojbe ki je zva, zašto je zva, i ča ti je činiti da ostaneš na „ liniji“.
U zadnjih ovih trideset godin, svašta se je nešto dogodilo, prominilo i pošlo s lipin vragon.
Zamislite svitu moj, kada sada nazove niki važni lik i reče, rečimo na primjer : „ Dobar dan, Smrt fašizmu-Faljen Isus-Za Dom parićani-Sloboda narodu! Ja bi htija da vi zaposlite najboljeg kandidata po imenu ton i ton .. i je li sve jasno, je.. dobro ajde Bog i Rvati!!
Majko moja, jel vidite vi u koja smo se mi sada govna uvalili?
Ki sada more znati čigov je ovaj ča je zva, jel naš ili njihov i oćeš li ga poslušati joli ne?
Ko ga poslušaš, a Un bude niki mučki provokator i đubre, ki je najebo? Ti, a ki će drugi!
Ko ga ne poslušaš, a Un bude Drug u Partiji ča je na vlasti, ki je najebo? Ti, a ki će drugi!
Majku moja, uvik niki kažin i nikako se liberati problemov.
Nego, opet san pošo na kvasinu. Poče san pisati o jednome a doša san na skroz drugo igralište i drugovačiji šport.
Otvori san jutros novine i gledan neko poznato lice preko dvi stranice u sredine stranice o športa.
Ki je, ma je, ma ni.. ma je.. to je moj prijatelj ča je jedan put bi fužbalist u prvu ligu, posli je pošo škupjati inozemne doznake u inožemstvo, i kad je završi svoju karijeru fužbaliste upisa je kurs za trenera o fuzbala. Sad je trener o fužbala u četrvtoj ligi Jug, tamo di igraju fužbalisti ča ujutro prebiru sabun na građevini joli nosu kruv iz pekare u kamijoncin, a popodne se obuču u monturu o treninga i unda teču livo desno i na skose, sve kako in naš školovani trener zapovidi.
Kako su pasala tri kola, a uni nisu izgubili njanka jednu utakmicu, dobili su prvo misto na tabeli i sada se pušu po novinama. I to ne na jednoj stranici ,nego na obadvije, ka ono kad bi nan svoje raskošne rekvizite pokazala Ana Pipi Saso ili ona Suzana od Lota iz Beograda.
Sada vi morete reći da san ja malo više zakvasina od jubomore na moga prijateja fužbalistu, i to sve poradi toga ča i mene nisu stavili u novine na duplericu.
A kako će me, svitu moj, staviti na duplericu kad me nećeti viditi kako igran fuzbal njanka na turniru o seniora invalida, a nisan ni završi kurs o trenera fužbaliste.
Zamislite svitu moj ča bi se to čitalo da se najde jedan novinar, ča je na primjer, karakter, pa un napiše reportažu sa moga gradilišta, a na reportaži velikin slovima piše:
„Šime Pitur- priča o uspjehu čovika s bauštele“
Naravski, tribalo bi to dobro nakititi i napisati malo i ono ča je i ono ča ni, ono, rečimo na primjer: „Ove smo godine napravili kirofu na tri kućerine, zatiplali smo do sada četri fasade i još se niti jedna ni odlipila, i za sada, u ovom dilu sezone uvjerljivo držimo prvo misto u četrvtoj ligi Fasada jug.”
Tribalo bi se lipo obući u novi trliš, dignuti desnu nogu malo na niki kavalet, pogled u svitliju budućnost i neka slikivaju ti novinari.
To bi se čitalo, kako mutavo!
Nebi prošlo ni dva dana, popizdili bi svi oni novinari iz onih nikih novin za ženskadiju i onih ča se tako osićaju , i svi bi htili intervuj pod hitno.
Njima bi in reko da more, ko će mi poslati uplatnicu na moj račun na Kajmanski otoki di držin gotovinu u valuti ča je čvrsta.
Čin bi se oni iskesali, primi bi ih u svoje dvore i pokaza in di živi elita o piturivanja iz četvrte lige Fasada jug , kako znan kuvati pjenice o gambereti i mušula na postejici od granula graška, sufle od maslačka i marfoo od bjelanjka kineske patke.
Novina u koluru, najbolja sjajna karta o novine, sve se sjaji ko pasja muda.. Božićno izdanje!!
Vidiš kako bi to moglo biti dobro.. Ma jasno van je da od toga nema baš puno vajde.
Još se ni naša dovojno plesnuti novinar ča bi riskira svoj posa i poša pisati o munjenon pituru ča se fali da je opitura tri kućerine na 6 podi i da mu niti jedna fasada ove godine još ni pala. Zasada..
Ima, svitu moj, meju vama siguro i pametnijih judi nego je to ovaj plesnuti pitur, ima sigurno i onih ča svaki dan činidu čuda, ča ste cinjeni suci u narodnon sudu, ča činite opreracijuni u bolnici, projekte, mašine, brode, ziđete velike zgradurine, moste i ceste, ma za pravo reći, koga bi to moglo zanimati? Kad se svi punti skupu, vi ste, da prostite na izrazu, jedna malo veća nula.
Ništa!!
Ko još niste skroz izlampili, vidite di ovo sve gre. Ko imate dicu i triba in dati neki kruto pametan savjet di bi oni i kako tribali pojti i kako urediti svoj život, malo mi se čini bez veze da in govorite da uču i študiraju, da utuku bar jednu, koliko ono, osan plus četri, plus pet+ dvi-tri, što krpe što konca, dvadeset godinic po redu kako bi bili na počeku.
Puno je boje, učiniti jedan kurs u susjednoj nan i prijatejskoj zemlji, kod Save Dušmanina u Banju Luku naručiti diplomicu, za nedaj bože potribu da se dica dikod zaposle. Kako smo mi s njiman još u zavadi, a mogli bi i opet skoro i zaratiti, nema Boga da će neki divji judi pojti kopati po tin diploman i školavanju.
Tote ste mirni..
I unda, potriba je sve svoje snage usmjeriti prema jednome cilju. Livi bek!
Znan ja da je vaša uzdanica uvik htila uvalivati goli i biti kako Rambo Ibrahimović oli Ronaldo, ma, pamet uglavu, znaš li ti koliko ima dice na svitu koja bi htila biti fužbalista golgeter. Puno, puno i preko mire puno. Ne triba završiti dotkorat o matematike da izračunaš da ti je puno pametnije sve snage uprtiti da dite bude livi bek. Jerbo, naša su dica sve po JUS- standardu, svi su visoki, lipi, dobro igraju sa glavušon i desnon nogon, ma , kad ti njega pitaš, sokole, a kako to gre s livon nogon, un se zacrveni kako i ti kad si mora odgovarati marksizam i socijalističko samoupravljanje a nisi ni pogleda onu lipu tanašnu knjižicu od četristotne stranic.
Ne zna na livu nogu, nego ča da ne zna. Nema pojma. E, i sada je tu tvoja šansa od stoljeća i šire.
Kumpare, udri ti njemu svaki dan trening, neka se diže na livu nogu is posteje, neka prvu skalinu uvik čini livon nogon, neka u zahodu isprid škojke uvik liva bude naprid, u crikvi kad treba kleknuti, obavezno na livu nogu.. i viditi ćeš čudo za neko vrime.
Ko mali nauči igrati livon nogon, kad uvati osamnaest godin, eto ti ga u reprezentaciji, sa dvaesetitri će potpisati ugovor sa toliko nul da nećeš ni znati pročitati, a unda je sve gotovo do kraja života, duplerice u boji, u gostima kod.., televizija, radijo, izjave za ovo i ono..
Livi bek !!! To je to!
Šime Pitur
