Kod nas se na brodu zna ki je kapo i kakova su pravila. Kapo ne viče, ne galami, ne lušći nogon u teće joli manicon po pajolima kad mu dojde žuta minuta.
Moji su van kumpanji sve ozbijni judi i građani, ka rečimo na primjer i ja, ča oće reći da in ne triba tri put reći ako dikod i naprave koju pizdariju.
Kod nas se na brodu zna ki je kapo i kakova su pravila. Kapo ne viče, ne galami, ne lušći nogon u teće joli manicon po pajolima kad mu dojde žuta minuta.
Za pravo reći, niko od nas na brodu se i ne sića da je Kapo ikad dignu glas na posadu, pa i unda kad smo zamiritali da nan izvuče uši na vrh glavuše.
Ča ćete, to je takvi brod, takvi je Kapo, ma je borami i kumpanija na brodu od šesta. Uvik lipo obučeni, čisti i uredni, ostriženi kako bog zapovido, ma ne ka oni ča su ka razbojnici, zaresli u bradurine i one kose ka da su jučer utekli iz amerikanskog srednjeg istoka ili sa onoga Vustoka, bože mi oprosti.
Regule se na brodu moraju znati. Prva je regula da prije nego smo odrišili cime, to oće reći kad smo se ujutro našli na čaju i kafi, to će reći da je to kafa i čaj a ne dvi litre pivuše i pelinkovac o Maraske.
Pelinkovac o Maraske je grih u tu uru, ma svi ovi drugi su grih i u tu uru i potlin, jerbo ne vajaju nivraga.
Malo mi je pobiglo ustranu, ča san ti hti reći.. a to je da da su svi derivati od otoga strogo zakračunani u našemu brodu dok je vrime od navigacije i regatanja.
Kapo, subito čin se otvori purtela za pojti u kabinu, stavi pod lokot sve ono na čemu imo rakije više od gustog soka o marelic. Za pravo reći, ni to baš lokot, nego više onako regula, ka ča je u crikvi Sveto pismo. To oće reći, u to se ne diraš, ne spominješ i ni na kraj pameti ti ni da provaš prominiti regulu jer ćeš uvatiti sankcije ko Rusi kad načinu kakvu pizdariju na srednjen istoku.
E sad, najde se na brodu dikod i ki ča je u klasi Bumbimir, i ča mu teško padaju te regule ča su kontra naroda i poštene inteligencije. Malo je reći da se more svašta naučiti od judi ča su u potribi, kako su puni genijalnog inžinjerskog duha i kako in gre od ruke sve kako bi se ulili kad in dojde potriba. Nije prošlo ni po ure od kako smo digli idra isprid porta, jedan je reko da ga čudo boli šupji zub i da bi mu baš pomoglo malo dežinfekcije i anestežije, pa da ko imo kakve rakije da će samo prohlamućati kroz usta da dojde sebi, jerbo da će ga ubiti ovaj zub. I tako svakih po ure..
Drugoga je baš zaboli štumak čin smo prošli puntu o škoja jer je gulaš na obedu bi grezo skuvan sa puno papra i one masti o prajci, izvajale su nas ove marete o tramontane, a to njemu baš učini barufu u štumak, i baš mu je o potribe malo nadignuti pelinkovca. Da će mu po litre biti taman, govori, da mu čirkulacija u štumak provrti svoje..
To njemu ni neka navika, to on samo kad je hitan slučaj ka ča je sada, rečimo na primjer.
Jedan je doni na brod tri bondonjere o Kraša ča unutrin plivaju one trišnje u rakiji, sve ih je poii dok smo napravili prvu manovru, jerbo da mu je cukar pošo na rezervu i da sada to triba nekako popraviti.
Ma, svitu moj, da ne bi pomislili da smo mi na robiji, naš je Kapo drug i starešina, čin se idra skalaju, brodić vežemo u porat, makina utrne i spušti onaj punat po krmi za izajti na kraj.
Oćeš biru, oćeš pelin o Maraske, oćeš vina u boji oli onaj svitlo crveni ča je ka malo za ženskice, samo reci..
A reko san van već prije, mi smo posada o šesta i reda, jesmo za nazdraviti, ma nas niko nikada ni vidi da okoliko brdižamo po suhon livo-desno u portu.
Di me je ova nevoja sa derivatima dovela, potroši san pola intereneta da napišen ono ča je moglo stati u po reda..
Daklen, alkohol niks na naš brod dok god traje navigacijun joli ragata, potlin more, i svaki za sebe čini sliku meju judiman. Ti me kapiši tute?
Nećaš me više uvatiti na ovaj parangal, neš ne.. odsada pa naprid pišen samo ukratko i ne trošim vražiji inerenet jer je on od potribe ovima drugiman ča su ka malo se prekoviše zakačili na oti vrazi o kompjukterov i ovih čud ča držu u ruci po cili božji dan.
Ukrcali smo tako jednoga ča je dok smo se još spremali za partencu učini bar trideset slik u kafiću, pa unda na putu od kafića do mula, pa unda opet na livoj bandi broda, pa opet na desnoj..
Govore mu ovi moji, ajde izvuci gindac o glavnog idra i provuci ga ispod gindaca o špina jer se se sve zamrižalo, a un govori da će evo samo čas da snimi video kako je lip na provi. I to sve sa onin telefonon, ča je veliki ka biježnica iz matematike za drugi razred , u ruki.. Aaaaa munjele..
U onoj barufi kad sudija kala doli bandiru na mulu i kad počne ona munještina di moraš paziti da od koga broda ne učiniš dvi polovice, njemu je to baš bilo napeto da učini slifi ili kako se taj vrag već reče, kad namisti svoju čunjku isprid toga čuda i unda po ure namišća usta ne bi li ispa boje. Majketi, ko ga nis puknu nogon unda, i nikada neću.. Vanka je skoro petnaest vitra, trideset je brodi na sto metri crte o starta, ostalo nan je još po menute munještine isprid crte, gledaš da te ki ne profunda, ozireš se da ti nekome ne učiniš bužu po boku, gazimo prema kraju sa vitron u po bande, isprid nas je još deset metri mora prije lipe sike, a un da se imo sada potribu javiti na taj vrag jer da ga žena sada baš nešto triba i da se nisu dogovorili jel će sutra na obed kod svekrve ili neće..
U taj je tren naš brod dobi i još jedno kruto importo pravilo, pravilo ča je jače nego one zapovidi u crikvi, a govoru da će skoro i onaj Mojsije iz Izrajela napraviti reviziju ča će se zvati 10 zapovidi plus jedna- revizija 1.1 i da će u njoj pisati; Kad staneš nogon na brod, ugasi vražji telefon i ne javljaj se nikome dok pasarela ne takne kraj ! Ti me kapiši?
Nikako mi ni to baš kjaro, kako moreš od života učiniti toliki pakal da se čin to čudo u žepu zazvoni moraš u roku hitno mašiti za kašetu i unda baliti po ure di si , ča ste, kad ćeš doma, i kako se obukla ona iz drugog portuna od nebodera.
Uimeisusuovo, neće se ništa dogoditi ko tri-četri ure ne budeš pogledivo u taj vrag od Inetnekta, ko se ne javiš podhitno čin čudo zazvrji u žepu.
Namoru si, razumin ja da ti tebeboga ne razumiš ni more, ni brode, ma tebi ne gine šest miseci u švicarskon brdu sa kravama ko se oćeš očistiti od te pandemije. Da tebe cijepu sa četiri doze, nebi se ni oćutilo, najboje ti je da te uredu na suho, kašeta umore i gotovo.
Mobilni korisnik nije dostupan! Čin uvati vrimena, javiti će van se dežurni zubatac joli gof!
Šime Pitur
